नागपूर शहरात गुन्हे शाखेची धडक कारवाई; दोन दिवसांत १८ कारवाया, २१ आरोपींवर कारवाई!30 लाखाचा मुद्देमाल पोलिसांनी केला जप्त!
नागपूर,WH NEWS (विजय खवसे ): नागपूर शहर पोलिसांच्या गुन्हे शाखेने दि. ८ ते ९ सप्टेंबर २०२६ या दोन दिवसांच्या कालावधीत शहरातील विविध भागांत धडक कारवाई करत एकूण १८ कारवाया केल्या. या कारवायांमध्ये २१ आरोपींचा उल्लेख असून, जुगार, अवैध दारू, बेकायदेशीर शस्त्रे, वाहन चोरी, घरफोडी तसेच प्रतिबंधित तंबाखूजन्य पदार्थांविरोधात कारवाई करण्यात आली.
गुन्हे शाखेच्या Daily Action Report नुसार, जुगारविरोधी ५, अवैध दारूविरोधी ५, बेकायदेशीर हत्यारांविरोधात २, महाराष्ट्र पोलीस अधिनियम कलम १२२(अ) अंतर्गत २, वाहन चोरी/चोरीच्या वाहनांच्या तपासासंदर्भात २, फरार पाहिजे आरोपीविरोधात १ आणि प्रतिबंधित तंबाखूजन्य पदार्थांप्रकरणी १ कारवाई करण्यात आली.
नायलॉन मांजाप्रकरणी ७ लाख ४५ हजारांचा मुद्देमाल जप्त
या कारवाईतील विशेष उल्लेखनीय कारवाई यशोधरा नगर पोलिस ठाणे हद्दीत करण्यात आली. नायलॉन मांजा विक्रीप्रकरणी कारवाई करत पोलिसांनी १ आरोपी व १ पाहिजे आरोपी यांच्यावर कारवाई केली. या प्रकरणात मोनो कार्ट नायलॉन मांजा, ई-रिक्षा, सुती मांजा आणि रिअलमी मोबाईल असा एकूण ₹७ लाख ४५ हजारांचा मुद्देमाल जप्त करण्यात आल्याचे अहवालात नमूद आहे.
वाहन चोरट्यांविरोधातही कारवाई
कपिलनगर परिसरात वाहन चोरीविरोधात कारवाई करण्यात आली. सुमारे ३० ते ४० दुचाकींचे स्पेअर पार्ट्स आणि टाटा मिनीबस असा मुद्देमाल जप्त करण्यात आला असून, या कारवाईत ₹३० लाखांपेक्षा अधिक किमतीचा मुद्देमाल असल्याचे अहवालात नमूद आहे.
तसेच बेलतरोडी परिसरातील ट्रक/बस चोरी उघडकीस आणताना दोन आरोपींना ताब्यात घेऊन टाटा मिनीबस हस्तगत करण्यात आली.
घरफोडीतील पाहिजे आरोपी अटक
गिट्टीखदान पोलिस ठाणे हद्दीत घरफोडीतील पाहिजे आरोपीला अटक करण्यात आली. त्याच्याकडून ₹१६ हजार किमतीचे चांदीचे दागिने जप्त करण्यात आले.
वाडीमध्ये बेकायदेशीर हत्याराविरोधात कारवाई
या कारवाईच्या मालिकेत वाडी पोलिस ठाणे हद्दीतील कारवाईचाही विशेष उल्लेख आहे. गुन्हे शाखेच्या युनिट-०१ मार्फत वाडी परिसरात बेकायदेशीर हत्यार बाळगणाऱ्या आरोपीविरोधात कारवाई करण्यात आली. पोलिसांनी एका आरोपीला ताब्यात घेऊन त्याच्याकडून चाकू जप्त केला. जप्तचाकूची किंमत ₹५०० असल्याचे अहवालात नमूद आहे.
जुगार अड्ड्यांवर धाड
गुन्हे शाखेने गणेशपेठ, नंदनवन, सदर, इमामवाडा, हुडकेश्वर आदी भागांत जुगारविरोधी कारवाया केल्या. या कारवायांमध्ये एकूण ५ कारवाया व ६ आरोपींवर कारवाई झाल्याचे अहवालात नमूद आहे.
अवैध दारूविरोधात ५ कारवाया
सक्करदरा, गिट्टीखदान, शांतिनगर, कपिलनगर आदी भागात अवैध दारूविरोधात कारवाई करण्यात आली. या प्रकरणांत एकूण ५ कारवाया करण्यात आल्या.
एकूण ₹३०.८५ लाखांपेक्षा अधिक मुद्देमाल जप्त
गुन्हे शाखेच्या या दोन दिवसांच्या कारवाईत विविध प्रकरणांमध्ये ₹३० लाख ८५ हजार ४५५ रुपयांपेक्षा अधिक किमतीचा मुद्देमाल जप्त करण्यात आल्याचे Daily Action Report मध्ये नमूद आहे.
गुन्हेगारीला आळा घालण्यासाठी नागपूर शहर पोलिसांची विविध पथकांमार्फत कारवाई सुरू असून, वाडी परिसरातही बेकायदेशीर हत्यारे बाळगणाऱ्यांविरोधात पोलिसांनी कडक भूमिका घेतल्याचे या कारवाईतून स्पष्ट झाले आहे.
