नागपूर उद्योजकतेचे नवे केंद्र; IIM नागपुरात 150 हून अधिक उद्योजकांचा मेळावा
नागपूर WH NEWS : शहरातील उद्योजकता परिसंस्थेला अधिक बळकटी देण्यासाठी आणि सूक्ष्म, लघु व मध्यम उद्योगांना (MSME) जागतिक स्तरावर स्पर्धात्मक बनविण्याच्या उद्देशाने आयआयएम नागपूर कन्व्हेन्शन सेंटर येथे “An Evening to Celebrate Entrepreneurship” या कार्यक्रमाचे आयोजन करण्यात आले.
नागपूर एंटरप्रेन्योरशिप मिशन (NEM) अंतर्गत ग्लोबल अलायन्स फॉर मास एंटरप्रेन्योरशिप (GAME) यांच्या पुढाकारातून झालेल्या या कार्यक्रमात 150 हून अधिक उद्योजक, उद्योगतज्ज्ञ, धोरणकर्ते, शैक्षणिक संस्था, विद्यार्थी आणि इकोसिस्टम भागीदार सहभागी झाले.
गेल्या वर्षभरात नागपूरच्या उद्योजकता परिसंस्थेत झालेल्या प्रगतीचा आढावा घेण्याबरोबरच जिल्हास्तरावर आर्थिक विकासाला गती देण्यासाठी आवश्यक सहकार्यावर या कार्यक्रमात सविस्तर चर्चा झाली. “MSME Thrives, District Rises” या विशेष सत्रात स्थानिक उद्योगांच्या वाढीसाठी राबविण्यात आलेल्या विविध उपक्रमांची माहिती देण्यात आली. TLC च्या माध्यमातून 112 पेक्षा अधिक MSMEs चे नेटवर्क उभे राहिले असून, InUnity ने 1,100 हून अधिक विद्यार्थ्यांना प्रत्यक्ष उद्योग समस्यांवर काम करण्याची संधी दिली आहे. तसेच Sanchiconnect च्या माध्यमातून नागपूरमध्ये सक्षम स्टार्टअप आणि उद्योजकता प्लॅटफॉर्म उभारण्याचे प्रयत्न सुरू असल्याची माहिती देण्यात आली.
यावेळी उद्योजक आणि विद्यार्थ्यांनी या उपक्रमांमुळे आपल्या व्यवसायात आणि नवकल्पनांमध्ये झालेल्या सकारात्मक बदलांचे अनुभव मांडले. दुसऱ्या सत्रात MSMEs ना स्थानिक बाजारपेठेपासून जागतिक बाजारपेठेपर्यंत पोहोचण्यासाठी आवश्यक बाजारपेठेतील दुवे, व्हॅल्यू चेन आणि भागीदारीचे महत्त्व उद्योगतज्ज्ञांनी स्पष्ट केले.
GAME चे संस्थापक रवि वेंकटेशन यांनी मोठ्या प्रमाणावर उद्योजकता ही रोजगारनिर्मिती आणि सर्वसमावेशक आर्थिक विकासाची गुरुकिल्ली असल्याचे सांगितले. कृत्रिम बुद्धिमत्ता (AI), बाजारपेठेतील प्रवेश आणि कर्जपुरवठा यांचा समन्वय साधल्यास नागपूर हे विकेंद्रित AI-आधारित उद्योजकतेचे देशातील आदर्श मॉडेल ठरू शकते, असा विश्वास त्यांनी व्यक्त केला.
NERVE चे अध्यक्ष शशिकांत चौधरी यांनी नागपूर एंटरप्रेन्योरशिप मिशनला शहराच्या उद्योजकता परिसंस्थेचे “ऑपरेटिंग सिस्टम” संबोधत हा केवळ एक उपक्रम नसून दीर्घकालीन विकासासाठी तयार करण्यात आलेली टिकाऊ चौकट असल्याचे सांगितले.
मुख्य अतिथी म्हणून उपस्थित विभागीय आयुक्त सौ. विजयलक्ष्मी बिदरी (IAS) यांनी जिल्हास्तरावरील आर्थिक विकासात MSMEs ची भूमिका अत्यंत महत्त्वाची असल्याचे नमूद केले. स्थानिक बाजारपेठ, बँका आणि पुरवठा साखळी यांवर आधारित विकास मॉडेलमुळे नागपूर इतर जिल्ह्यांसाठीही आदर्श ठरू शकतो, असे त्या म्हणाल्या.
कार्यक्रमात फूड एंटरप्रेन्योर अॅक्सेलरेटर प्रोग्राम यशस्वीरित्या पूर्ण करणाऱ्या 23 MSMEs चा विशेष सन्मान करण्यात आला. तसेच उद्योजकता परिसंस्थेला योगदान देणाऱ्या विविध संस्थांचाही गौरव करण्यात आला. नेटवर्किंग डिनरसह कार्यक्रमाची सांगता झाली.
आयोजकांच्या मते, या कार्यक्रमामुळे नागपूर हे उदयोन्मुख उद्योजकता केंद्र म्हणून अधिक ठळकपणे समोर आले असून, सरकार, उद्योग, शैक्षणिक संस्था आणि गुंतवणूकदार यांच्या संयुक्त प्रयत्नांतून रोजगारनिर्मिती आणि दीर्घकालीन आर्थिक विकासाला चालना मिळणार आहे.
