राज्यसभेच्या उमेदवार मायाताई ईवनाते यांचे नागपुरात जंगी स्वागत; भाजपातर्फे उत्साहात करण्यात आली ‘लाडू तुला’
-डॉ. बाबासाहेब आंबेडकरांना आणि राजे बख्त बुलंदशहा यांना पुष्पहार अर्पण करून केले अभिवादन
नागपूर WH NEWS – भारतीय जनता पक्षातर्फे राज्यसभा सदस्यत्वासाठी उमेदवारी जाहीर झाल्यानंतर, नागपूरच्या माजी महापौर मायाताई ईवनाते यांचे आज शहरात प्रथमच आगमन झाले. डॉ बाबासाहेब आंबेडकर विमानतळावर आगमन झाल्यानंतर कार्यकर्त्यांनी उत्साहात घोषणा देऊन स्वागत केले,भाजप शहर अध्यक्ष दयाशंकर तिवारी व भाजपा आदिवासी आघाडी चे अध्यक्ष आकाश मडावी यांनी पुष्पगुच्छ देऊन स्वागत केले,या ऐतिहासिक क्षणाचे स्वागत करण्यासाठी भाजप कार्यकर्त्यांकडून भव्य सोहळ्याचे आयोजन करण्यात आले होते.सर्वप्रथम मायाताई ईवनाते यांनी संविधान चौक येथे भेट देऊन भारतीय राज्यघटनेचे शिल्पकार भारतरत्न डॉ. बाबासाहेब आंबेडकर यांच्या पुतळ्याला पुष्पहार अर्पण करून विनम्र अभिवादन केले.
यावेळी कार्यकर्त्यांनी दिलेल्या घोषणांनी संपूर्ण परिसर दुमदुमून गेला होता.नंतर मायाताईंनी नागपूर शहराचे संस्थापक राजे बख्त बुलंदशहा यांच्या पुतळ्याला माल्यार्पण करून अभिवादन केले. यानंतर, त्यांच्या उमेदवारीचा आणि नागपूरला मिळालेल्या या बहुमानाचा आनंद साजरा करण्यासाठी भाजप नागपूर तर्फे मायाताईंची भव्य ‘लाडू तुला’ करण्यात आली. हे लाडू उपस्थित नागरिक आणि कार्यकर्त्यांमध्ये वाटून आनंदोत्सव साजरा करण्यात आला.यावेळी माजी आमदार सुधाकर कोहळे,शहर महामंत्री श्रीकांत आगलावे,संदीप जाधव,महिला मोर्चा अध्यक्ष दिव्याताई धुरडे,युवा मोर्चा अध्यक्ष सचिन करारे,सतीश डागोर आदिवासी आघाडीचे महामंत्री रोहित कुंभरे,ललित मडावी,अनिकेत कुमरे,उपाध्यक्ष अश्विन गेडाम, सागर इवनाते व भाजपचे ज्येष्ठ पदाधिकारी, नगरसेवक,कार्यकर्ते, महिला आघाडीच्या प्रतिनिधी आणि नागरिक मोठ्या संख्येने उपस्थित होते. “मायाताईंच्या उमेदवारीमुळे कार्यकर्त्यांमध्ये मोठे चैतन्य पसरले असून,आगामी काळात पक्षाला यामुळे मोठी शक्ती मिळेल”असा विश्वास शहर अध्यक्ष दयाशंकर तिवारी यांनी यावेळी व्यक्त केला.