देशी कट्ट्यासह तिघे जेरबंद
◼️महाराष्ट्र-मध्य प्रदेश चेक पोस्ट वरील कारवाई
◼️98 हजार रुपयांचा मुद्देमाल हस्तगत
गोंदिया, : लोकसभा निवडणुकीच्या पार्श्वभूमीवर जिल्ह्याच्या सीमावर्ती भागात पोलिसांकडून कडक बंदोबस्त ठेवण्यात आला असून महाराष्ट्र-मध्य प्रदेश राज्याच्या सिमेवर असलेल्या आरटीओ चेक पोस्ट वर तपासणीदरम्यान रावणवाडी पोलिसांनी कट्यासह तीन आरोपींना ताब्यात घेतले आहे. तिन्ही आरोपींकडून देशी कट्ट्यासह 98 हजार रुपयांचा मुद्देमाल हस्तगत केला आहे.
लोकसभा निवडणुकीच्या अनुषंगाने राज्य तसेच जिल्हा सीमेवर पोलिसांनी कडक बंदोबस्त लावला आहे. पोलीस अधिक्षक निखील पिंगळे, अपर पोलीस अधीक्षक नित्यानंद झा, यांनी आगामी काळात लोकसभा निवडणुक असल्याने गोंदिया जिल्ह्यातील कायदा, सुव्यवस्था, शांतता अबाधित राखण्यासाठी जिल्ह्यातील सर्व पोलीस ठाणे हद्दीतील अवैध धंद्यावर तसेच अवैधरित्या शस्त्रे, बाळगणारे गुन्हेगारावर आळा घालण्याकरीता कारवाई करण्याचे निर्देश सर्व ठाणे प्रभारी यांना दिले आहेत.
त्या अनुषंगाने 21 एप्रिल रोजी रात्री दरम्यान पोलीस ठाणे रावणवाडीचे पोलीस निरीक्षक पुरुषोत्तम अहेरकर, सहाय्यक पोलीस निरीक्षक सुनिल अंबुरे व पो. हवा. संजय चौहान व पथक पोलीस स्टेशन रावणवाडी हद्दीत पेट्रोलिंग करित असताना तीन इसम मोटार सायकल क्रमांक एम.पी.50/ एम.टी. 7198 वर ट्रिपल सीट बसुन बालाघाट कडुन गोंदियाकडे जाणार असुन त्यांचेकडे पिस्तुल सारखा दिसणारा गावठी कट्टा विक्री करण्याकरिता गोंदियाला जाणार असल्याची माहिती मिळाल्याने पोलीस अधिकारी व पोलीस अमलदार यांनी गोंदिया बालाघाट मार्गावरील आरटीओ बॅरेल चेक पोस्ट जवळ सापळा रचुन नाकाबंदी केली. दरम्यान मोटार सायकल क्रमांक एम.पी. 50 / एम.टी. 7198 येत असताना दिसून आल्याने तिन्ही संशयितांना थांबवुन विचारणा केली असता संशयित इसम नामे विशाल मुलायचंदसिंह लिल्हारे (वय 23, रा. बगदरा ता. जि. बालाघाट (म.प्र.) व त्याचे सोबत असलेले दोन विधीसंघर्षीत बालकांना ताब्यात घेण्यात आले.
त्यांचेकडे असलेल्या सामानाची पाहणी करून झडती घेतली असता एक पिस्तुल सारखा दिसणारा गावठी कट्टा किमत 50 हजार रुपये, 30 हजार रुपये किमतीची काळ्या रंगाची मोटार सायकल क्रमांक एम.पी. 50/ एम.टी. 7198 , निळ्या रंगाचा रेडमी कंपनीचा मोबाईल किमत 3 हजार रुपये, सिल्वर रंगाचा ओपो कंपनीचा मोबाइल फोन किमत 10 हजार रुपये, निळ्या रंगाचा विवो कंपनीचा मोबाइल फोन किमत 5 हजार रुपये असा एकुण 98 हजार रुपयांचा मुद्देमाल मिळुन आल्याने हस्तगत करून जप्त करण्यात आले. उपरोक्त नमुद आरोपी व दोन विधीसंघर्षीत बालकांविरुध्द पोलीस स्टेशन रावणवाडी येथे फिर्यादी पो. हवालदार संजय रमेश चौहान यांचे रिपोर्ट वरुन अपराध क्रमांक 104/ 2024 कलम 3, 25 भारतीय हत्यार कायदा अन्वये गुन्हा नोंद करण्यात आला असुन पोलीस निरीक्षक पुरुषोत्तम अहेरकर यांचे मार्गदर्शनात सहाय्यक पोलीस निरीक्षक सुनिल अंबुले पुढील तपास करित आहेत.